Яны любяць кветкі, А мы любім іх…

У суботу, 4 сакавіка, у філіяле Нацыянальнага гістарычнага музея Рэспублікі Беларусь “Гасцёўня Уладзіслава Галубка” адкрылася выстава акварэльных работ трох жанчын: Ларысы Стрыжак (Мінск), Наталлі Харольскай (Мінск) і Святланы Румянцавай (Масква). Экспазіцыя мае сімвалічную назву — “Мы любім кветкі…”. Хто з жанчын не любіць, калі на свята і не толькі на свята ёй дораць кветкі? Якая з жанчын сама не становіцца падобнай да кветкі ў момант шчасця і замілавання? І якая кветка не просіцца ў святочныя дні ў рукі жанчыны, каб аддаць ёй сваё цяпло і прыгажосць? Гэтыя ледзь улоўныя рухі пачуццяў і памкненні асабліва выразна здольна перадаць менавіта акварэль.

Ларыса Стрыжак, Наталля Харольская і Святлана Румянцава даўно ведаюць адна адну. І ўсе тры маюць непасрэднае дачыненне да адукацыі. Ларыса і Наталля разам вучыліся на аддзяленні дызайну Беларускай дзяржаўнай акадэміі мастацтваў, з’яўляюцца сябрамі Беларускага саюза дызайнераў. Ларыса Стрыжак сёння выкладае на кафедры дызайну ў Беларускім дзяржаўным універсітэце, Наталля Харольская — на кафедры дызайну ў Мінскім інавацыйным універсітэце, а Святлана Румянцава не так даўно атрымала прафесію дызайнера ў БДУ (вучылася якраз у Ларысы Стрыжак), жыве сёння ў белакаменнай і вядзе там дызайнерскія курсы.

Іх рашэнне выставіцца разам у “Гасцёўні Уладзіслава Галубка” было амаль спантанным і вельмі натуральным. Усе трое яны вельмі любяць кветкі, і ім проста захацелася падарыць свята самім сабе і ўсім, хто гэтымі святочнымі днямі будзе рамантычна прагульвацца па набярэжнай Свіслачы і надумае завітаць у музей.

Распускаецца кветка, да апошняга не ведаючы, калі гэта адбудзецца.

Улюбляецца жанчына, нават не чакаючы ад сябе самой кахання.

Нечакана ў самым пачатку каляндарнай вясны прыходзіць вясна сапраўдная, як гэта мы бачым сёлета.

Яны любяць кветкі, а мы любім іх…

Мікола ЧЭМЕР.
Фота аўтара.