Культывуем у Год культуры

На гэтым тыдні ўрачыстай цырымоніяй уручэння прэмій прэзідэнта “За духоўнае адраджэнне”, спецыяльных прэмій прэзідэнта дзеячам культуры і мастацтва, а таксама спецыяльнай прэміі прэзідэнта “Беларускі спартыўны Алімп” быў афіцыйна адкрыты абвешчаны сёлета ў нашай краіне Год культуры.

Кіраўнік дзяржавы Аляксандр Лукашэнка на цырымоніі нагадаў прысутным, што Беларусь багатая на таленты і творчыя дасягненні, якія з’яўляюцца гордасцю краіны. І яскравым пацвярджэннем гэтага сёлета стане шырокае святкаванне юбілеяў нашых выдатных дзеячаў мастацтва: Уладзіміра Мулявіна, Максіма Багдановіча, Кандрата Крапівы, Івана Шамякіна… На самым высокім узроўні будзе праведзены і 25-ы юбілейны фестываль “Славянскі базар у Віцебску”, на якім выступаюць прызнаныя майстры і запальваюцца новыя зоркі. “Культура знаходзіцца ў аснове ідэалогіі дзяржаў, указваючы тыя напрамкі і мэты, на якія арыентуецца грамадства”, — адзначыў беларускі лідар. …А вы, дарагія чытачы, тым часам у руках трымаеце 121-шы выпуск нашага культуралагічнага дадатку “Рэй”, які таксама ў гэтым годзе адзначае юбілей. Першы выпуск адбыўся роўна дзесяць гадоў назад у студзені 2006 года.
Людзям культурным, а такімі, безумоўна, з’яўляюцца нашы чытачы, магчыма, і не трэба было б лішні раз нагадваць, што само лацінскае слова cultura паходзіць ад дзеяслова colere, які мае мноства значэнняў — культываваць, апрацоўваць, урабляць, шанаваць. Але давайце задумаемся, што, а дакладней, каго мы ў такім разе культывуем.
Нашых вучняў — выдатнікаў і троечнікаў, часам “неачэсаных”, непадрыхтаваных да разумення сутнасці культуры і тым не менш нам дарагіх. Нашых родных, блізкіх, каханых, сяброў, знаёмых, якіх таксама іншы раз хочацца зрабіць больш культурнымі і адукаванымі.
А яшчэ давайце ўспомнім пра тое, што словы “культура” і “культ” — аднаго гістарычнага кораня. Узводзіш культуру ў культ — і робішся культурным сам, і спадзяешся на прысутнасць культуры вакол цябе. А таксама на тое, што ўсё наша грамадства — гэта адмысловы рэй, акультураны, культурацэнтрычны.
Дык будзем жа культываваць наша з вамі жыццё!
Бо нічога ж, па вялікім рахунку, пасля нас не застаецца нашым нашчадкам, акрамя культуры.

Мікола ЧЭМЕР,
рэдактар аддзела культуры, адказны за выпуск культуралагічнага дадатка “Рэй”.
Фота Алега ІГНАТОВІЧА.